Kis Kis Ke Aansu Puchhoge Aur Kis Kis Ko Bahlaoge

kis kis ke aañsū pūchhoge aur kis kis ko bahlāoge

ik din aa.egā tum bhī shāmil un meñ ho jāoge

rañg havā maiñ tair rahe haiñ titlī kā bahrūp liye

saare rañg utar jā.eñge tum gar haath lagāoge

umr-e-azīz gañvā.ī apnī sāyoñ kā pīchhā karte

saa.e kis ke haath aa.e haiñ aur tum bhī kyā pāoge

chauthe khūñT ko jā to rahe ho lekin ye vo rasta hai

tum ne agar muḌ kar dekhā to patthar ke ho jāoge

sail-e-havādis meñ ham sab ab patthar ban kar zinda haiñ

kaise sher kahoge ‘ishqī’ kis ko sher sunāoge

Leave a Comment