Sheikh Ibrahim Zauq
nimcha yaar ne jis vaqt baghal men maara
jo chaḌha munh use maidan-e-ajal men maara
maal jab us ne bahut radd-o-badal men maara
ham ne dil apna uTha apni baghal men maara
us lab o chashm se hai zindagi o maut apni
ki kabhi pal men jalaya kabhi pal men maara
khinch kar ishq-e-sitam-pesha ne shamshir-e-jafa
pahle ik haath mujhi par tha azal men maara
charḳh-e-bad-bin ki kabhi aankh na phuTi sau baar
tiir naale ne mire chashm-e-zuhal men maara
ajal aa.i na shab-e-hijr men aur ham ko falak
be-ajal tu ne tamanna-e-ajal men maara
ishq ke haath se ne qais na farhad bacha
is ko gar dasht men to us ko jabal men maara
dil ko us kakul-e-pechan se na bal karna tha
ye siyah-baḳht gaya apne hi bal men maara
kaun fariyad sune zulf men dil ki tu ne
hai musalman ko kafir ke amal men maara
urs ki shab bhi miri gor pe do phuul na laa.e
patthar ik gumbad-e-turbat ke kanval men maara
aankh se aankh hai laḌti mujhe Dar hai dil ka
kahin ye jaa.e na is jang-o-jadal men maara
ham ne jaana tha jabhi ishq ne maara us ko
tesha farhad ne jis vaqt jabal men maara
na hua par na hua ‘mir’ ka andaz nasib
‘zauq’ yaron ne bahut zor ghazal men maara
Leave a Reply