Ahmad Husain Mail
kyuun shauq badh gaya ramazan men singar ka
roza na tuut jaae kisi roza-dar ka
un ka vo shokhiyon se phadakna palang par
vo chhatiyon pe lotna phulon ke haar ka
huur aae khuld se to bithaun kahan use
arasta ho ek to kona mazar ka
shishon ne tarz udaai ruku o qayam ki
kya in men hai lahu kisi parhez-gar ka
kyuun ghash hue kalim tajalli-e-tur par
vo ik charagh tha mire dal ke mazar ka
baad-e-fana bhi saaf nahin dil raqib se
gumbad khada hua hai lahad par ghubar ka
kasrat ka rang shahid-e-vahdat ka hai banav
vo ek hi se naam hai hazda hazar ka
naqus bin ke puchhne jaun agar mizaj
but bhi kahenge shukr hai parvardigar ka
dulha ki ye barat hai rasmen ada karo
dar par janaza aaya hai ik jan-nisar ka
kya kya tadap tadap ke sarafil gir pade
dam aa gaya jo suur men mujh be-qarar ka
surma ke saath phail ke kya vo bhi mit gaya
kyuun naam tak nahin tiri ankhon men pyaar ka
kya raat se kisi ki nazar lag gai ise
achchha nahin mizaj dil-e-be-qarar ka
ankhen miri faqir huiin shauq-e-did men
tasma kamar men hai nigah-e-intizar ka
lutun maze jo bazi-e-shatranj jiit luun
is khel men to vaada hai bos-e-kanar ka
allah mira ghafur mohammad mire shafia
‘mail’ ko khauf kuchh nahin roz-e-shumar ka
Leave a Reply