Raziya Subhan
bad-o-baran ki nigahon men nami achchhi lagi
ham ko apni zindagi ki bekali achchhi lagi
qadr kab is zindagi ki zindagi men ho saki
maut aa.i ru-ba-ru to zindagi achchhi lagi
baḌh ke jis ne thaam li laghzish miri be-saḳhta
aaj us ma.asum ki ye sadgi achchhi lagi
guunj par zanjir ki ik raqs bismil ne kiya
zulm ki vahshi faza men naghmagi achchhi lagi
barmala kuchh kah diya kuchh kahte kahte ruk ga.e
ham ko us ki ik kahi ik an-kahi achchhi lagi
baar tha jis ki tabi.at par sada zauq-e-suḳhan
aaj us ko bhi hamari sha.iri achchhi lagi
Leave a Reply