har naqsh hai vajud-e-fana mere samne
hairan huun ye rang hai kya mere samne
ik shakl si hai meri tarah mere ru-ba-ru
ik harf sa hai mere siva mere samne
gum-sum khaḌi hai meri sada mere as-pas
divar ban ga.i hai hava mere samne
khulta nahin ki a.ina-e-ka.enat men
kya hai misal-e-aks-e-nava mere samne
jangal ka vo safar bhi mubarak hua mujhe
jab chal raha tha mera ḳhuda mere samne
ik ajnabi sada si ta.aqub men thi mire
dekha jo muḌ ke kuchh bhi na tha mire samne
ab sochta huun bikhra hua dasht-e-ḳhak men
ye kaun mujh ko toḌ gaya mere samne
‘qaisar’ hua tha samna ik shakl se mira
phir us ke ba.ad kuchh na raha mere samne
Leave a Reply