Bekhud Dehlvi
teshe se koi kaam na farhad se hua
jo kuchh hua vo ishq ki imdad se hua
meri taraf jo zulf se phenka nikal kar
aisa qusur kya dil-e-nashad se hua
apne ḳhiram-e-naz ki un ko ḳhabar nahin
kahte hain hashr teri hi fariyad se hua
be-hukm yuun kisi ko satata nahin falak
mujh par ye zulm aap ke irshad se hua
‘beḳhud’ ki tarah kaun tumhen jaan de saka
ye kaam ishq men usi nashad se hua
Leave a Reply