naqsh paani pe bana ho jaise
zindagi mauj-e-bala ho jaise
mujh se bach bach ke chali hai duniya
mere nazdik ḳhuda ho jaise
koi tahrir mukammal na hui
mujh se har lafz ḳhafa ho jaise
kis qadar shahr men sannaTa hai
ab ke koi na bacha ho jaise
is tarah puuj rahi hai duniya
koi mujh se bhi baḌa ho jaise
raah milti hai andheron men mujhe
koi masruf-e-dua ho jaise
mujh ko aksar ye hua hai mahsus
koi kuchh puchh raha ho jaise
ghar se is tarah nikal aa.e ‘amir’
koi dushman na raha ho jaise
Leave a Reply