Dil Bata Aur Kya Hai Hone Ko

Raza Amrohvi

dil bata aur kya hai hone ko

choT khaa.i hai main ne rone ko

be-nava ḳhvab muntazir hain mire

raat baaqi kahan hai sone ko

sozan-e-shauq ko shab-e-hijran

sirf aansu mile pirone ko

apni ḳhushiyon men dusron ke gham

hausla chahiye samone ko

nahin ma.alum intizam hai kya

daman-e-zist ke bhigone ko

nik.haton ke dayar men mujh ko

atishin gul mile pirone ko

roz ummid jaag jaati hai

gum-shuda aarzu ke khone ko

kuchh to ahbab kaam a.enge

kashti-e-shauq ke Dubone ko

fikr us ko ho jis ke paas ho kuchh

kuchh nahin mere paas khone ko

main huun tanha.i ka samundar hai

gham khaḌe hain mujhe Dubone ko

agahi sirf kaam aa.i ‘raza’

mere dagh-e-junun ke dhone ko