Shaista Sahar
gul nahin ḳhaar samajhte hain mujhe
sab giran-bar samajhte hain mujhe
hain andhere bhi gurezan mujh se
chashm-e-bedar samajhte hain mujhe
meri peshani pe mehrab nahin
vo gunahgar samajhte hain mujhe
daulat-e-dard mera sarmaya
kyuun vo nadar samajhte hain mujhe
duur baiThe hain miri mahfil se
vaj.h-e-azar samajhte hain mujhe
chara-gar bhi hain gurezan mujh se
tera bimar samajhte hain mujhe
kya kahun un se ma.al-e-ulfat
jo tiri haar samajhte hain mujhe
meri ghurbat nahin khulti mujh par
log zardar samajhte hain mujhe
mera isbat mohabbat hai miri
aur vo inkar samajhte hain mujhe
main nahin bazm se jaane vaali
ahal-e-darbar samajhte hain mujhe
kab samajhna vo mujhe chahte hain
kar-e-dushvar samajhte hain mujhe
kyuun ‘sahar’ haal suna.un un ko
mere gham-ḳhvar samajhte hain mujhe
Leave a Reply