gar dil men tabassum ka ik tiir utar jaa.e
nau-ḳhasta ghunche ki taqdir sanvar jaa.e
jab jab koi tufan sa is dil se guzar jaa.e
vo chehra-e-rangin bhi kuchh aur nikhar jaa.e
jab dil pe mohabbat ka tufan guzar jaa.e
shabnam se sharar Tapke sho.alon se asar jaa.e
divana tire ruḳh ka aur maut se Dar jaa.e
jis dil men sadaqat ho mumkin nahin mar jaa.e
ye ḳhun-e-mohabbat hai ḳhanjar na Thahar jaa.e
ik mahshar-e-betabi rag rag men utar jaa.e
ye rah-e-mohabbat hai jo is se guzar jaa.e
parvah nahin us ko zar jaa.e ki sar jaa.e
ulfat ki zafar-mandi us roz main samjhunga
jab aah miri tere siine men utar jaa.e
is dil pe guzarti hai kaifiyat-e-ranga-rang
tufan sa umaD aa.e dariya sa utar jaa.e
hai ḳhuub magar phir bhi vo paikar-e-rang-o-bu
kuchh aur nikhar jaa.e kuchh aur sanvar jaa.e
kya turfa-tamasha hai faizan-e-mohabbat se
jannat se bashar nikle jannat men bashar jaa.e
Leave a Reply