ho chuki ab sha.iri lafzon ka daftar bandh lo
tang ho jaa.e zamin to apna bistar bandh lo
dosh par iman ki gaThri ho sar ho ya na ho
peT ḳhali hain to kya peTon pe patthar bandh lo
afiyat chaho to jhuk jaao sar-e-pa-posh-e-vaqt
phir ye dastar-e-fazilat apne sar par bandh lo
qazi-ul-hajat se ik ahd bandha tha to kya
ab faqih-e-shahr se ahd-e-mukarrar bandh lo
ashiyanon men chhupe baiThe hain sab shahin-o-zagh
tum bhi ‘sha.ir’ ta.ir-e-taḳh.il ke par bandh lo
Leave a Reply