Arsh Sahbai
gham-e-mazi gham-e-hazir gham-e-farda ke siva
zindagi kuchh bhi nahin ḳhun-e-tamanna ke siva
dekhte dekhte hi naav kahan Duub ga.i
kis ko ma.alum hai tughyani-e-dariya ke siva
un se rudad-e-sitam kahiye to kyuun kar kahiye
jin ko kuchh yaad nahin shikva-e-beja ke siva
mere is hal-e-pareshan ki ḳhabar kis ko nahin
sab pe zahir hai haqiqat ye masiha ke siva
mushkilen TuuT paḌin jab bhi havadis ki tarah
koi apna na hua ik dil-e-tanha ke siva
paanv men jitne bhi chhale the sabhi phuuT paḌe
koi samjha na mire dard ko sahra ke siva
‘arsh’ kal raat jo mahfil men hue hangame
janta kaun hai vo saghar-o-sahba ke siva
Leave a Reply