uThi hai jo qadmon se vo daman se aḌi hai
kya kya nigah-e-shauq pe zanjir paḌi hai
vo yaas ka aalam hai ki har ek nazar par
mahsus ye hota hai juda.i ki ghaḌi hai
yuun dekhiye to marhala-e-shauq hai yak gaam
chaliye to yahi ek qadam raah kaḌi hai
har ek qadam par hai kisi yaad ka saaya
har rahguzar men koi divar khaḌi hai
har ghunche ke chehre se ubharte hain tire naqsh
har gul men tire husn ki tasvir juḌi hai
kheli thi kabhi husn se tere nigah-e-shauq
itna hai tujhe yaad yahi baat baḌi hai
naseh tiri baton se kaTi hijr ki ye shaam
ik aur fasana ki abhi raat paḌi hai
kya janiye kya tha tira andaz-e-‘tabassum’
har dekhne vaale ki nazar mujh pe paḌi hai
Leave a Reply