uThi Hai Jo Qadmon Se Wo Daman Se aDi Hai

uThī hai jo qadmoñ se vo dāman se aḌī hai

kyā kyā nigah-e-shauq pe zanjīr paḌī hai

vo yaas kā aalam hai ki har ek nazar par

mahsūs ye hotā hai judā.ī kī ghaḌī hai

yuuñ dekhiye to marhala-e-shauq hai yak gaam

chaliye to yahī ek qadam raah kaḌī hai

har ek qadam par hai kisī yaad kā saaya

har rāhguzar meñ koī dīvār khaḌī hai

har ġhunche ke chehre se ubharte haiñ tire naqsh

har gul meñ tire husn kī tasvīr juḌī hai

khelī thī kabhī husn se tere nigah-e-shauq

itnā hai tujhe yaad yahī baat baḌī hai

nāseh tirī bātoñ se kaTī hijr kī ye shaam

ik aur fasāna ki abhī raat paḌī hai

kyā jāniye kyā thā tirā andāz-e-‘tabassum’

har dekhne vaale kī nazar mujh pe paḌī hai

Leave a Comment