bharen na vaqt ke hathon jarahaten teri
rakhen sambhal ke dil ne amanaten teri
chhupa ke tujh se kahan apne roz-o-shab le ja.un
jahan-e-nur tira aur zulmaten teri
bichhaḌ ke tujh se mila umr-bhar ka sannaTa
bana ga.iin mujhe tanha rifaqaten teri
tu hai vo fatah-e-alam ki ek duniya ne
shikast kha ke sarahi hi himmaten teri
tire nuqush-e-qadam se bahar thi in ki
hain muntazir mire dil ki masafaten teri
kahan hai sham-e-tamanna malahaton ka vo rang
kahan hain sub.h-e-tasavvur sabahaten teri
dil-e-hazin tiri chaukhaT pe umr kaun ganva.e
kabhi samajh men na aa.iin zaruraten teri
azal se shisha-e-gardun men ret chalti hai
kabhi shumar men aa.iin na sa.aten teri
tu meri shirkat-e-hasti kahin qubul to kar
tamam ranj mire sab masarraten teri
Leave a Reply