Ghamgin Be-Maza Badi Tanha Udas Hai

ghamgin be-maza badi tanha udaas hai

tere baghair to miri duniya udaas hai

phaila hua hai raat ki ankhon men soz-e-hijr

mahtab-rut men chand ka chehra udaas hai

lo phir se aa gaya hai judai ka marhala

ankhen hain nam miri tira lahja udaas hai

barish baha ke le gai tinkon ka ashiyan

bhige shajar ki shaḳh pe chidiya udaas hai

shahzada so gaya hai kahani sune baghair

bachpan ke taaq men rakhi gudiya udaas hai

ankhen munder par dhare guzri shab-e-visal

lipta hua kalai se gajra udaas hai

suraj lipat ke jhiil ke paani se ro diya

manzar firaq-e-sham ka kitna udaas hai

kis ko hain raas hijr ki kathnaiyan ‘sahar’

jitna qarib ho koi utna udaas hai

Leave a Comment