vo bahki nigahen kya kahiye vo mahki javani kya kahiye
vo kaif men Duube lamhon ki ab raat suhani kya kahiye
uljhi hui zulfen ḳhvab-asar badmast nigahen vaj.h-e-baqa
duniya se magar imkan-e-shab-e-asrar-o-ma.ani kya kahiye
rudad-e-mohabbat sun sun kar ḳhud husn ko bhi niind aane lagi
ab aur kahan se laa.en dil ab aur kahani kya kahiye
jiina bhi bahut hi mushkil hai marna bhi koi asan nahin
allah re kashakash ulfat ki kya ji men hai Thani kya kahiye
‘farhat’ ka pata puchhe jo koi kaafi hai faqat ye kaafi hai
phuTi hui qismat TuuTa dil ab aur nishani kya kahiye
Leave a Reply