umid-e-mehr par ik hasrat-e-dil ham bhi rakhte the
tamanna vasl ki ai mah-e-kamil ham bhi rakhte the
kabhi gulzar dagh-e-ishq se dil ham bhi rakhte hai
kabhi ik taaza gulshan ai anadil ham bhi rakhte the
kisi din to vo bahr-e-husn aa kar zeb-bar hota
ki aghosh-e-tamanna shakl-e-sahil ham bhi rakhte the
alag tu bazm se uth kar jo sun leta to kah dete
ki kuchh kuchh iltija ai zeb-e-mahfil ham bhi rakhte the
hamen be-maut kyuun maara ajal tu kis liye aai
hava-e-bosa-e-shamshir-e-qatil ham bhi rakhte the
hamare dil ka uqda kyuun na ai ghuncha-dahan khola
havas bose ki thi thodi si mushkil ham bhi rakhte the
karen ab kya kahan dhundhen ganvaya ku-e-gesu men
kabhi yadash-ba-khair ai hamdamo dil ham bhi rakhte the
hamara imtihan o qadar-andaz lazim tha
dil-e-majruh-o-muztar jan-e-bismil ham bhi rakhte the
kiya pamal us ko kyuun na tum ne saath sabze ke
tumhare zer-e-pa ai jan-e-jan dil ham bhi rakhte the
nahin ab kasrat-e-dagh-e-junun se laeq-e-hadiya
kabhi dil peshkash karne ke qabil ham bhi rakhte the
haqarat se na dekho aaj ham ko ai pari-ruyo
kabhi tum sa koi zohra-shamail ham bhi rakhte the
ajab hai kya hui ulfat vo ai jaan donon janib ki
yahi dil tum bhi rakhte the yahi dil ham bhi rakhte the
yunhi shab bhar jala karte the yad-e-shoala-e-rukh men
yahi sozish kabhi ai sham-e-mahfil ham bhi rakhte the
lab-e-jan-bakhsh par kya fauq dete chashm-e-fattan ko
ki ‘anjum’ kuchh tamiz-e-haqq-o-batil ham bhi rakhte the