mujhe talash thi jis ki vahi kabhi na mili
har ek chiiz mili ek zindagi na mili
tiri talash men pairon men paḌ ga.e chhale
magar ai manzil-e-maqsud tu kabhi na mili
ḳhushi se dosti meri bhi thi magar ik din
ḳhafa hui vo kuchh aisi ki phir kabhi na mili
vo jis charagh ke dam se makan raushan tha
usi charagh ko ḳhud apni raushni na mili
tumhare hijr men aisa bhi vaqt aaya hai
badan TaTol ke dekha to nabz hi na mili
ye jism hai ki faqat shor gul hai sanson ka
ye aankh hai ki koi ḳhvab dekhti na mili
dil-o-dimagh pe haavi raha gham-e-dauran
ḳhushi ke saath bhi rah kar mujhe ḳhushi na mili
mujhe na mil saka suraj mire mukaddar ka
tira nasib tujhe meri ‘chandni’ na mili
Leave a Reply