Ahmad Ali Barqi Azmi
hinsa ke pahle mujhe phir rula gaya ik shakhs
fasana kah ke fasana bana gaya ik shakhs
dikha ke ek jhalak apni chashm-e-mai-gun se
mai-e-nashat ye kaisi pila gaya ik shakhs
kahun to kaise kahun ik ajiib manzar tha
nigar-khana-e-hasti saja gaya ik shakhs
khalish si uthti hai rah rah ke qalb-e-muztar men
tha kaisa tir-e-nazar jo chubha gaya ik shakhs
na jaane aa gaya dam-e-fareb men kaise
tha sabz baagh jo mujh ko dikha gaya ik shakhs
thi jis se sham-e-shabistan-e-zindagi raushan
jila ke sham-e-mohabbat bujha gaya ik shakhs
men us ko dekh ke hosh-o-havas kho baitha
jab aaya hosh men uth kar chala gaya ik shakhs
khumar jis ka abhi tak hai sar men ‘barqi’ ke
sharab-e-shauq ka chaska laga gaya ik shakhs
Leave a Reply