Qaisar Haideri Dehlvi
teri be-ruḳhi miri maut thi hua iltifat kabhi kabhi
tire iltifat ki ḳhair ho ki mili hayat kabhi kabhi
rah-e-arzu men kahin kahin mujhe rok dete hain hadse
gham-e-ishq hai mira mustaqil gham-e-ka.enat kabhi kabhi
miri jumbish-e-lab-e-gham-zada jo tire mizaj pe baar hai
mire anso.on ki zaban se sun gham-e-dil ki baat kabhi kabhi
nahin ek haal men kuchh maza karo chashni bhi mujhe ata
miri zindagi ke sukut men na.i vardat kabhi kabhi
vo jahan kahin nazar aa ga.e baḌa ittifaq hasin raha
mujhe tirgi thi nasib men mili chand raat kabhi kabhi
main zamin-navard tha ishq men magar aise moḌ bhi aa ga.e
mah-o-mehr tak mujhe le gaya safar-e-hayat kabhi kabhi
tira ‘qaisar’ amn-o-sukun men bhi na bacha fareb-e-jamal se
tiri ik nigah se khul gaya dar-e-hadsat kabhi kabhi
Leave a Reply