dukh to dukh the jo idhar bahr-e-aman aa nikle
aap is dil ke ḳharabe men kahan aa nikle
ik zara nikle to avaz daba den apni
kya karen chup ka agar us ki zaban aa nikle
jaane kab qahqahe rona paḌen ahbab ke saath
jaane atraf men kab shahr-e-fughan aa nikle
kuchh to dil-jui chale dhup-numa ḳhvahish ki
dasht men tazkira-e-abr-e-ravan aa nikle
mere qadmon se kare junhi masafat aghaz
zad-e-rah men se usi vaqt ziyan aa nikle
dekhte dekhte suraj ka lahu shaam hui
shab ke alam the jitne bhi ba-jan aa nikle
apne sahra se bandhe pyaas ke maare hue ham
muntazir hain ki idhar koi kuaan aa nikle
kya main phir bhi na karun aag sulagne ka guman
jab miri saans ki naali men dhuan aa nikle
a.ine bech ke ab chalte bano ‘ḳhavar’ tum
is se pahle ki koi sang-e-giran aa nikle
Leave a Reply