kaise unhen bhulaun mohabbat jinhon ne ki
mujh ko to vo bhi yaad hain nafrat jinhon ne ki
duniya men ehtiram ke qabil vo log hain
ai zillat-e-vafa tiri izzat jinhon ne ki
tazin-e-kaenat ka baais vahi bane
duniya se ikhtilaf ki jurat jinhon ne ki
asudgan-e-manzil-e-laila udaas hain
achchhe rahe, na tai ye masafat jinhon ne ki
ahl-e-havas to khair havas men hue zalil
vo bhi hue kharab, mohabbat jinhon ne ki
Leave a Reply