dam-e-isa yad-e-baiza ke qarine vaale
ab na mansur na suqrat se piine vaale
vahi kuufi vahi lashkar vahi paiman-e-vafa
vahi asar moharram ke mahine vaale
dam nikalta hai na sar jhukta hai divanon ka
jaane kis aas pe jiite hain ye jiine vaale
ye jo sahil ke manazir hain jo avazen hain
ja ke us paar na pa.enge safine vaale
ham mohabbat ki alamat hain janab-e-va.iz
ham adavat ke talabgar na kiine vaale
ek paigham ho shayad miri ḳhamoshi bhi
tujh ko ma.alum nahin lab mire siine vaale
aaj kuchh log hain surat-gar-e-halat ‘aḳhtar’
aur kuchh log hain maazi ke dafine vaale
in ko thoḌi si uḳhuvvat bhi ata ho jaa.e
ye jo lete hain tira naam madine vaale
Leave a Reply