lafz gunge ho ga.e lahje ki ayyari ke ba.ad
vo barahna ho gaya itni adakari ke ba.ad
chand bosida kitaben kirm-ḳhurda kuchh varaq
ye sila bhi kam nahin ik jurm-e-fankari ke ba.ad
raat ke manzar khuli ankhon men patthar ho ga.e
ḳhvab men jaage hue lagte hain bedari ke ba.ad
ansuon ko qahqahon ka ruup de jaata hai vo
is tarah hansta to hai lekin kala-kari ke ba.ad
jin kitabon men rakhe the ḳhvab guzri fasl ke
ham ne ḳhud un ko jala Daala nigah-dari ke ba.ad
ab kisi se kya kahen badnam-e-vahshat ka sabab
ḳhud bhi sharminda hain ham dil ki subuksari ke ba.ad
Leave a Reply