parinde lauT ke jab ghar ko jaane lagte hain
hamen bhi yaad dar-o-bam aane lagte hain
fasil-e-sarhad-e-mazi dhaḌakne lagti hai
jo ḳhvab niind ka dar khaTkhaTane lagte hain
hubab dhuup ki barish men phuTte bante
sabat-e-zat ka matlab batane lagte hain
sar-e-mahaz tire aate hi harif mire
ye mere haath mujhe azmane lagte hain
tire ḳhayal ki mahfil jo sajne lagti hai
qarib-e-hal guzishta zamane lagte hain
jo asman ko zid hai to kam nahin ham bhi
ki bad-e-barq na.e ghar banane lagte hain
jo sunte hain ki tire shahr men dashra hai
ham apne ghar men divali sajane lagte hain
suni-suna.i si har ik kahani lagti hai
na.e hain lafz ma.ani purane lagte hain
Leave a Reply