ab ye sochun to bhanvar zehn men paḌ jaate hain
kaise chehre hain jo milte hi bichhaḌ jaate hain
kyuun tire dard ko den tohmat-e-virani-e-dil
zalzalon men to bhare shahr ujaḌ jaate hain
mausam-e-zard men ik dil ko bacha.un kaise
aisi rut men to ghane peḌ bhi jhaḌ jaate hain
ab koi kya mire qadmon ke nishan DhunDega
tez andhi men to ḳheme bhi ukhaḌ jaate hain
shaghl-e-arbab-e-hunar puchhte kya ho ki ye log
pattharon men bhi kabhi aa.ine jaḌ jaati hain
soch ka aa.ina dhundla ho to phir vaqt ke saath
chand chehron ke ḳhad-o-ḳhal bigaḌ jaate hain
shiddat-e-gham men bhi zinda huun to hairat kaisi
kuchh diye tund havaon se bhi laḌ jaate hain
vo bhi kya log hain ‘mohsin’ jo vafa ki ḳhatir
ḳhud-tarashida usulon pe bhi aḌ jaate hain
Leave a Reply