Ye Faza-E-Nil-Gun Ye Baal-O-Par Kafi Nahin

Hanif Fauq

ye faza-e-nil-gun ye bal-o-par kaafi nahin

mah-o-anjum tak mira zauq-e-safar kaafi nahin

ek saa.at ik sadi hai ik nazar afaq-gir

ab nizam-e-gardish-e-sham-o-sahar kaafi nahin

phir junun ko vus.at-e-aflak hai koh-e-nida

ai dil-e-divana dasht-e-pur-ḳhatar kaafi nahin

ye hava-e-nam ye siine men sulagti aag si

aah ye umr-e-ravan ki rah-guzar kaafi nahin

phir mashiyyat se ulajhti hai miri divangi

nala-e-shab-gir ashkon ke guhar kaafi nahin

arzu-e-be-karan hai aur jism-e-na-tavan

kya rag-e-jan ke liye ye neshtar kaafi nahin

ḳhunki-e-shabnam se ghunche ko nahin taskin-e-qalb

zaḳhm-e-gul ko ab nasim-e-chara-gar kaafi nahin

shisha-e-shab men bhari hai ‘fauq’ jo sahba-e-kaif

qatra qatra bhi piyun to raat bhar kaafi nahin