Jab Dekhte Rahte Hain Wo Kirdar Hamare

jab dekhte rahte haiñ vo kirdār hamāre

hoñ kyuuñ na pashemāñ dar-o-dīvār hamāre

dete haiñ har ik raah meñ rahgīr ko saaya

jalte haiñ kaḌī dhuup meñ ashjār hamāre

taqsīm ke sadqe meñ hameñ kuchh to milegā

chal phuul tumhāre haiñ to sab ḳhaar hamāre

aa jaao ki mil-jul ke koī shakl banā leñ

haiñ tishna-e-takmīl vo shah-kār hamāre

sadiyoñ ke qarīne liye tahzīb hamārī

yuuñ ‘roz’ badalte nahīñ me.aar hamāre

Leave a Comment