aaj ki shab to kisi taur guzar jaegi
raat gahri hai magar chand chamakta hai abhi
mere mathe pe tira pyaar damakta hai abhi
meri sanson men tira lams mahakta hai abhi
mere siine men tira naam dhadakta hai abhi
ziist karne ko mire paas bahut kuchh hai abhi
teri avaz ka jaadu hai abhi mere liye
tere malbus ki khushbu hai abhi mere liye
teri banhen tira pahlu hai abhi mere liye
sab se badh kar miri jaan tu hai abhi mere liye
ziist karne ko mire paas bahut kuchh hai abhi
aaj ki shab to kisi taur guzar jaegi!
aaj ke baad magar rang-e-vafa kya hoga
ishq hairan hai sar-e-shahr-e-saba kya hoga
mere qatil tira andaz-e-jafa kya hoga!
aaj ki shab to bahut kuchh hai magar kal ke liye
ek andesha-e-be-nam hai aur kuchh bhi nahin
dekhna ye hai ki kal tujh se mulaqat ke baad
rang-e-ummid khilega ki bikhar jaega
vaqt parvaz karega ki thahar jaega
jiit ho jaegi ya khel bigad jaega
khvab ka shahr rahega ki ujad jaega
Leave a Reply