Tere Shahr-e-Amn Ka Kya Kahen Ki Har Ek Makan Juda Sa Hai

Afeef Siraj

tire shahr-e-amn ka kya kahen ki har ik makan juda sa hai

hain daron pe qufl lage hue sar-e-taq diip bujha sa hai

tira dasht bhi to hai be-karan miri vahshaton ki bhi had nahin

mire jurm-e-khana-kharab ko to ye rahguzar bhi dilasa hai

tiri yaad aai to kis tarah main pukarta hi chala gaya

koi dam ruka to khabar hui ki ye koh koh-e-nida sa hai

miri ghairat-e-hama-gir ne mujhe tere dar se utha diya

kuchh ana ka zor jo kam hua to khabar hui tu khuda sa hai

abhi la ki manzil-e-sakht men huun fareb-o-vahm-o-guman liye

mire dil men phir bhi basa hua tira naam radd-e-bala sa hai

ye masafaten shab-e-tar ki ye na khatm hone ke silsile

abhi fasla rag-e-jan se hai to hanuz garche zara sa hai

tire khatt-e-husn-e-jamal ko mire harf-e-aina-saz ne

kai rang de diye pur-kashish magar ab bhi ek khala sa hai