be-jhijak, be-khatar
be-dhadak vaar kar
meri gardan uda
aur khuun se mire kamyabi ke apni nae jaam bhar
chhin le husn-o-khubi, anaa, dilkashi
mere lafzon men lipta hua mal-o-zar
meri poron se bahti hui raushni
mere mathe pe likkhe hue sab hunar
tujh se shikva nahin
ai adu mere main teri hamdard huun
teri be-chehragi mujh ko bhati nahin
tujh se kaise kahun!!!
tujh se kaise kahun! qatl karna mujhe tere bas men nahin
(aur ho bhi agar, teri kam-maegi ma mudava nahin)
haan magar teri dil-jui ke vaste
meri gardan pe yuun tera khanjar rahe
(teri danist men)
khel jaari rahe
Leave a Reply