Talib Baghpati
har-chand bhulata huun bhulaya nahin jaata
ik naqsh-e-taḳhayyul hai miTaya nahin jaata
main ne jo kaha dard baḌhaya nahin jaata
kahne lage nadan jataya nahin jaata
ummid ki kashti ko sahara to laga do
maana ki tumhen saath biThaya nahin jaata
vo dagh-e-mohabbat ka nishan puchh rahe hain
halanki samajhte hain dikhaya nahin jaata
ab un ka taqaza hai kahani nahin kahte
jab qissa-e-gham ham se sunaya nahin jaata
iza-talabi ki koi had ho to jafa ho
ab vo bhi hain majbur sataya nahin jaata
tum aaoge aur shab ko zara soch ke kahte
tum se to tasavvur men bhi aaya nahin jaata
‘talib’ miri baten unhen bavar nahin atin
dil chiir ke pahlu ko dikhaya nahin jaata
Leave a Reply