Pritpal Singh Betab
kuchh to hain paikar pareshan azaron ke darmiyan
aur kuchh aazar pareshan pattharon ke darmiyan
sab ḳhabar hote hue pir-e-mughan hai be-ḳhabar
tishnagi ka ghalghala hai sagharon ke darmiyan
bhiiḌ ki be-chehragi men hain ka.i chehre nihan
chand sar vaale bhi hain in be-saron ke darmiyan
aao sab ik roz mil baiThen ye sochen kyuun hui
is qadar bechargi charagaron ke darmiyan
hadson ke shahr men ik hadsa ye bhi hua
ek shisha aa gaya hai pattharon ke darmiyan
ja-e-hairat is na.i tahzib men maujud hai
ik purana sa khanDar unche gharon ke darmiyan
vo to bhari paḌ gaya ‘betab’ ik bichchhu ka Dank
umr varna kaT chuki thi azdahon ke darmiyan
Leave a Reply