Siya Sachdev
ab tire shahr se chup-chap guzarna hoga
zinda hote hue har moḌ pe marna hoga
mere halat agar koi samajhna chahe
us ko ik baar mire dil men utarna hoga
naqsh maazi ke miTa kar sabhi dil se apne
dard-o-gham se hamen ik baar ubharna hoga
ham ne sachcha.i ki har baar himayat ki hai
ham ko is bhuul ka ḳhamyaza to bharna hoga
aa.ina jaan ke dekhungi tiri ankhon ko
jab kabhi tere liye mujh ko sanvarna hoga
is mohabbat ko na lag jaa.e kahin koi nazar
ham ko duniya ki nigahon se bhi Darna hoga
dekhna hai hamen ik va.ada-faramosh ‘siya’
shaam tak dhuup ke sahra men Thaharna hoga
Leave a Reply