Gham Yan To Bika Hua Khada Hai

gham yaan to bika hua khada hai

fidvi hai fida hua khada hai

hilta nahin tere dar se ye ishq

muddat se mila hua khada hai

khunin-kafan-e-shahid-e-ulfat

dulha sa bana hua khada hai

tuk gosha-e-chashm idhar bhi koi

kone se laga hua khada hai

daman ka hai gher gird-e-janan

kyuun ji vo ghira hua khada hai

yuun dil ko baghal men main ne paala

ye mujh pe pila hua khada hai

kya samjhe namaz-e-ishq naseh

qible se bhara hua khada hai

mujre ko tumhare abruon ke

mehrab jhuka hua khada hai

mizan nahin milti meri us ki

ghussa men pila hua khada hai

ghar se to nikal ki dar pe ‘ehsan’

kya gham men ghira hua khada hai

palkon se giri hai ashk tap tap

pat se vo laga hua khada hai

Leave a Comment