barahman mujh ko banana na musalman karna
mere saaqi mujhe mas-mai-irfan karna
dagh-e-dil siine men aahon se numayan karna
ham se sikhe shab-e-gham koi charaghan karna
haram-o-dair men ja ja ke charaghan karna
justuju teri hamen ta-had-e-imkan karna
dil ke bahlane ka vahshat men ye saman karna
chashm-e-khun-bar se daman ko gulistan karna
havas-e-sair-e-gulistan ne qafas dikhlaya
ab asiro na kabhi qasd-e-gulistan karna
ahl-e-be-dad ke jab naam pukare jaaen
tum na ghabra ke sar-e-hashr kahin haan karna
na kabhi main ne kaha tha ki mujhe dard mile
na kahunga ki mire dard ka darman karna
un ke divanon ko sar phod ke divaron se
aaj manzur hai araish-e-zindan karna
shaikh ko kaaba mubarak ho barahman ko kunisht
ham ko sajda taraf-e-kucha-e-janan karna
ai saba tujh ko usi zulf-e-pareshan ki qasam
mera shiraza-e-hasti bhi pareshan karna
un ke divanon ki eajaz-e-nigahi dekho
aankh uthana ki gulistan ko bayaban karna
dagh-e-dil parde men rah jaae na ai dast-e-junun
chaak kuchh aur abhi mera gareban karna
la ke phir misr men ai ishq kisi yusuf ko
phir nae rang se araish-e-zindan karna
dasht-e-ghurbat men tire khak-nashin achchhe hain
chahiye aur inhen be-sar-o-saman karna
zauq-e-sajda tujhe sang-e-dar-e-janan ki qasam
hosh ka mujh ko na sharminda-e-ehsan karna
uth rahe hain mire nazron se dui ke parde
kuchh madad aur khayal-e-rukh-e-janan karna
ban gae hairat-e-nazzara ki surat ‘bedam’
raas aaya na hamen diid ka arman karna
Leave a Reply