kya kahen mahfil se teri kya uTha kar le ga.e
ham mata-e-dard ko tanha uTha kar le ga.e
dhuup ka sahra nazar aata hai ab charon taraf
aap to har peḌ ka saaya uTha kar le ga.e
ab vahi zarre hamare haal par hain ḳhanda-zan
asman tak jin ko ham uncha uTha kar le ga.e
kya gharaz ham ko vahan ab koi bhi abad ho
ham to us basti se ghar apna uTha kar le ga.e
vo to majnun tha raha jo umr bhar sahra-navard
ham jahan pahunche vahin sahra uTha kar le ga.e
kar na paa.e rahbar bhi rahnuma.i jab ‘hayat’
ham bhi hairani men naqsh-e-pa uTha kar le ga.e
Leave a Reply