abdul-mannan-tarzi

Meri Aankhon Mein Aansu Pyare

meri ankhon men aansu pyare

ghar tumhara hai tum raho pyare

ghair ki baat men na tum aana

main kahun aur tum suno pyare

lutf-e-sohbat mata-e-ulfat hai

kuchh kaho aur kuchh suno pyare

ik fareb-e-nazar hai kuchh bhi nahin

ye gulistan-e-rang-o-bu pyare

kaun kitna vafa ka hai paband

faisla hoga mu-ba-mu pyare

hai tamanna tumhari sab ko magar

tum ho aap apni aarzu pyare

ik mohabbat hai vo shikayat bhi

jo kare koi ru-ba-ru pyare

ham na chhodenge sheva-e-taslim

tum jo chaho vo tum karo pyare

nam-leva tumhara hai ‘tarzi’

aadmi ki tarah milo pyare

More Poems

Leave a Comment