zalim se mustafa ka amal chahte hain log
sukhe hue daraḳht se phal chahte hain log
kaafi hai jin ke vaste chhoTa sa ik makan
puchhe koi to shish-mahal chahte hain log
saa.e ki mangte hain rida aftab se
patthar se aa.ine ka badal chahte hain log
kab tak kisi ki zulf-e-pareshan ka tazkira
kuchh apni uljhanon ka bhi hal chahte hain log
bar-e-gham-e-hayat se shane hue hain shal
ukta ke zindagi se ajal chahte hain log
rakhte nahin nigah taqazon pe vaqt ke
talab ke baghair kanval chahte hain log
jis ko bhi dekhiye hai vahi dushman-e-sukun
kya daur hai ki jang-o-jadal chahte hain log
darkar hai najat gham-e-rozgar se
mirriḳh chahte hain na zuhal chahte hain log
‘ejaz’ apne ahd ka main tarjuman huun
main janta huun jaisi ghazal chahte hain log
Leave a Reply