Poet
phulon ko tabassum ki ada tujh se mili hai
gulshan ko junun-ḳhez hava tujh se mili hai
ai ḳhuld-nazar jan-e-chaman ruh-e-baharan
shabnam ko ye namnak ziya tujh se mili hai
bazm-e-mah-o-anjum ko bhi ai shahid-e-rana
ye nuur se bharpur faza tujh se mili hai
gulgun lab-o-ruḳhsar ke sadqe men shafaq ko
ye rang ki daulat ba-ḳhuda tujh se mili hai
us ru-e-ziya-bar pe ye abr ka ghungaT
bijli ko yaqinan ye haya tujh se mili hai
saaqi tiri ankhon ki qasam saghar-e-mai ko
ye kaifiyat-e-hosh-ruba tujh se mili hai
ai dost teri nim-nigahi ke tasadduq
dil ko ḳhalish-e-ruh-faza tujh se mili hai
kaunain ke har raaz ko mahram jise kahiye
‘mansha’ ko vahi fikr-e-rasa tujh se mili hai
Leave a Reply