ahmad-adil

Humse To Rah-O-Rasm Hai Aghyar Ki Tarah

ham se to rah-o-rasm hai aghyar ki tarah

duniya pe mehrban hain gham-khvar ki tarah

kam-maegi na puchh miri bazm-e-ghair men

uthti hai har nigah kharidar ki tarah

main tajiran-e-ishq ke baare men kya kahun

in ka junun hai garmi-e-bazar ki tarah

khud-sakhta buton ko main ab tod-tad kar

pujunga bas usi ko parastar ki tarah

zauq-e-nazar ko aap samajhte hain gar gunah

nadim khada huun main bhi gunahgar ki tarah

dekhi hai main ne shakh se patton ki rukhsati

jaane na dunga ab tujhe har baar ki tarah

zad-e-safar ki fikr na manzil ka ho khayal

rah-e-talab men aao talabgar ki tarah

chaha hai tum ko yuun ki tumhen bhi khabar na ho

socha hai tum ko an-kahe ashar ki tarah

kahne ko koi band-o-salasil nahin magar

sab hain fasil-e-jan men giraftar ki tarah

‘adil’ rukh-e-nigar nahin dil ka aaina

iqrar-e-khas hota hai inkar ki tarah

More Poems

Leave a Comment