kaisa maftuh sa manzar hai ka.i sadiyon se
mere qadmon pe mira sar hai ka.i sadiyon se
ḳhauf rahta hai na sailab kahin le jaa.e
meri palkon pe tira ghar hai ka.i sadiyon se
ashk ankhon men sulagte hue so jaate hain
ye miri aankh jo banjar hai ka.i sadiyon se
kaun kahta hai mulaqat miri aaj ki hai
tu miri ruuh ke andar hai ka.i sadiyon se
main ne jis ke liye har shaḳhs ko naraz kiya
ruuTh jaa.e na yahi Dar hai ka.i sadiyon se
us ko aadat hai jaḌen kaTte rahne ki ‘vasi’
jo miri zaat ka mehvar hai ka.i sadiyon se
Leave a Reply