vaqt aḳhir le gaya vo shoḳhiyan vo bankpan
phuul se chehre the kitne aur the nazuk badan
log rakhte hain dilon men atish-e-bughz-o-hasad
aur phir karte hain shikva jal raha hai tan badan
chal paḌe jab janib-e-manzil to phir ai ham-safar
kya safar ki mushkilen kya duriyan kaisi thakan
ham nahin toḌenge apna ittifaq-o-ittihad
kar chuke hain faisla ye ab sabhi ahl-e-vatan
un ki sazish hai ki bas nam-e-vafa miTta rahe
meri koshish hai phale-phule vafaon ka chalan
jashn hoga phir vafa ka dosti ka ek din
phir sajegi pyaar ke ehsas ki ik anjuman
jo bhi hain ‘shayan’ ahl-e-zarf un ko ḳhauf kya
un ke aage sar-nigun hain vaqt ke dar-o-rasan
Leave a Reply