nahin samjhi thi jo samjha rahi huun
ab uljhi huun to khulti ja rahi huun
bahut gahri hai us ki khamushi bhi
main apne qad ko chhota pa rahi huun
umanD aaya hai shor auron ke ghar se
dariche khol ke pachhta rahi huun
hujum itna ki chehre bhuul jaun
bisat-e-zat ko phaila rahi huun
ye manzar puchhte hain mujh se aksar
kahan se aai huun kyuun ja rahi huun
agar sach hai to phir sabit karo tum
main apne aap ko jhutla rahi huun