kahin jangal ugate hain kahin aahu banate hain
musavvir hain tire pahlu ko sad pahlu banate hain
bhala kya qatl par apne raqibon se gila ki vo
mira naafa juda kar ke tiri ḳhushbu banate hain
tahammul siikh ham se guftugu kar narm lahje men
ki sab tere ravayye hi ko apni ḳhu banate hain
kahin koi sitara chhoḌte hain be-karani men
kabhi andher nagri men koi jugnu banate hain
adu kaise sitamgar hain mujhe tasḳhir karne ko
tiri tasvir ke uupar mire baazu banate hain
hamen to ḳhvab men bhi zulf suljhane ki aadat hai
magar vo log jo uljhe hue gesu banate hain
tire ka.abe se kuchh iman valon ko gharaz hogi
ki ham kafir to but-ḳhana bhi qibla-ru banate hain
ham aise kushtagan-e-ḳhak hi ‘akash’ sahra men
saba ko apne dil ki dhonkni se lau banate hain
Leave a Reply