ye log jis se ab inkar karna chahte hain
vo guftugu dar-o-divar karna chahte hain
hamen ḳhabar hai ki guzrega ek sail-e-fana
so ham tumhen bhi ḳhabar-dar karna chahte hain
aur is se pahle ki sabit ho jurm-e-ḳhamoshi
ham apni raa.e ka iz.har karna chahte hain
yahan tak aa to ga.e aap ki mohabbat men
ab aur kitna gunahgar karna chahte hain
gul-e-umid farozan rahe tiri ḳhushbu
ki log use bhi giraftar karna chahte hain
uTha.e phirte hain kab se azab-e-dar-badri
ab is ko vaqf-e-rah-e-yar karna chahte hain
jahan kahani men qatil bari hua hai vahan
ham ik gavah ka kirdar karna chahte hain
vo ham hain jo tiri avaz sun ke tere hue
vo aur hain ki jo didar karna chahte hain
Leave a Reply