ungliyan pher raha tha vo ḳhayalon men kahin
lams mahsus hua hai mire balon men kahin
ab mira saath nahin deta piyada dil ka
haar ja.un na main aa kar tiri chalon men kahin
is tashaḳhḳhus pe bhi rahta hai ye dhaḌka dil ko
kho na ja.un main tire chahne valon men kahin
ek suraj ne mujhe chand ka rutba baḳhsha
varna hoti main kitabon ke havalon men kahin
mujh ko lagta to nahin vo mutazalzal lekin
is ko vahshat hi na le jaa.en ghazalon men kahin
Leave a Reply