pakizgi nahin hai ridaon men in dinon
ma.asumiyat rahi na adaon men in dinon
raas aa ga.i hasinon ko shahron ki raushni
mausam bahut udaas hai gaanv men in dinon
as.hab-e-kahf ki tarah jo nek log hain
gosha-nashin hain vo guphaon men in dinon
shaffaf raston se to lipTi hui hai dhund
chhaya hua dhuan hai fazaon men in dinon
us ki chubhan se maut hi behtar hai ham-nashin
kanTa chubha hai jo mire paanv men in dinon
puna hai bamba.i hai safar hai qayam hai
chakkar bandha hai ik mire paanv men in dinon
‘aqib’ bujha bujha sa tu lagta hai gar to kya
suraj chhupa hua hai ghaTaon men in dinon
‘aqib’ tire ḳhulus ka hai mo.ajiza ki log
karte hain yaad tujh ko duaon men in dinon
Leave a Reply