jo hamare vaste sab diin the iman the
un ke hathon men faqat ghairon ke hi divan the
phir kaha us ne ki jab viran kar degi tumhen
zindagi is ko bata ham to sada viran the
ye nahin ki dard-e-dil dard-e-jigar ka ḳhauf tha
us ke jaane se hamen kuchh aur bhi nuqsan the
jaane kyon saare jahan ka dard is dil ko mila
is jahan men ham se achchhe aur bhi insan the
zindagi ko DhunDne aa.e hain ham tere jahan
apni basti men to har ja maut ke imkan the
ham ne kab chaha tha ke ham is tarah lachar hon
ye bhi ham pe doston ke ja-ba-ja ehsan the
Leave a Reply