Jo Hamare Waste Sab Din the Iman The

jo hamāre vāste sab diin the īmān the

un ke hāthoñ meñ faqat ġhairoñ ke hī dīvān the

phir kahā us ne ki jab vīrān kar degī tumheñ

zindagī is ko batā ham to sadā vīrān the

ye nahīñ ki dard-e-dil dard-e-jigar kā ḳhauf thā

us ke jaane se hameñ kuchh aur bhī nuqsān the

jaane kyoñ saare jahāñ kā dard is dil ko milā

is jahāñ meñ ham se achchhe aur bhī insān the

zindagī ko DhūñDne aa.e haiñ ham tere jahāñ

apnī bastī meñ to har jā maut ke imkān the

ham ne kab chāhā thā ke ham is tarah lāchār hoñ

ye bhī ham pe dostoñ ke jā-ba-jā ehsān the

Leave a Comment