Poet
hujum-e-ranj-o-alam hai ye nim-jan ke liye
jafa vo karte hain ashiq pe imtihan ke liye
buton ke jaur-o-jafa par main sabr karta huun
yahan ke vaste kuchh hai to kuchh vahan ke liye
khuda ke vaste rahne de apne dar pe use
bana hai sang ye dil tere astan ke liye
hamare pahlu-e-ghamgin men haif ye dil-e-zar
nazakaton se pala ulfat-e-butan ke liye
tapak ke dida-e-pur-nam se kyuun na gir jaata
bana lahu mira dil chashm-e-khun-chakan ke liye
hava-e-tund khuda ke liye na chhed mujhe
ghubar-e-rah bana huun main karvan ke liye
kiya hai dard-e-dil-e-zar ne use aajiz
labon pe jan-e-hazin aai hai fughan ke liye
‘jamila’ ta-dar-e-mahbub kis tarah jaun
qadam uthana hai dushvar na-tavan ke liye
Leave a Reply